Francuski buldog Jules je u dvorištu porodične kuće u Monroviji (Kalifornija) primijetila dva medvjeda i odmah se dala u obračun, uprkos tome što su njeni protivnici bili daleko snažniji

Francuski buldog Jules, neustrašiva ljepotica teška oko devet kilograma, dobila je titulu heroja jer se u petak iskazala kao prvorazredni pas čuvar, zaštitnik svoje porodice i svoje teritorije.

Naime, Jules je u dvorištu porodične kuće u Monroviji (Kalifornija) primijetila dva medvjeda i odmah se dala u obračun, uprkos tome što su njeni protivnici bili daleko snažniji, prenosi portal dnevnik.hr.

Istina, medvjedi na koje se namjerila nijesu bili stariji od godinu dana i teži od 50 kilograma, ali to svejedno ne mijenja činjenicu da u njoj kuca srce junačko.

Medvjedi su, inače, u tamošnjim planinskim krajevima prirodni stanovnici, ali otkako su požari poharali šume, sve češće prilaze kućama u potrazi za hranom.

Doduše, problem je u tome i što su pojedini susjedi počeli da ih hrane, a što medvjede ohrabruje da se motaju po dvorištima.

“Nije mi svejedno. Ljut sam na te ljude, to ne bi smjeli da rade. Imam dvoje male djece i nijesam srećan što se medvjedi motaju okolo”, izjavio je vlasnik hrabre Jules, David Hernandez, koji je i sam priznao da je ostao šokiran kada je vidio da se njegova ljepotica pretvorila u “Wolverinea”.