Porodica koja se sa odmora iz domovine vraćala u zapadnu Evropu, zaboravila je na jednoj benzinskoj pumpi kod Niša četrnaestogodišnju ćerku. Nestanak djeteta primijetili su tek u Lapovu, pa su alarmirali tamošnju policiju koja je obavijestila niške kolege, pa je djevojčica zbrinuta do povratka zaboravnih roditelja.

Kako prenose mediji, nesvakidašnji događaj odigrao se 7. avgusta oko 7:45 sati na pumpi na dionici autoputa Beograd – Niš gdje su se članovi porodice, inače iz Turske, zaustavili radi odmora.

“Djevojčica i njen brat su spavali na zadnjem sjedištu automobila kada su roditelji napustili vozilo. Tokom njihovog odsustva i četrnaestogodišnjakinja je izašla iz kola ali se mimoišla sa ocem i majkom. Oni su ušli u automobil i nastavili put, a da im djeteta nema primijetili su tek kod Lapova, kada se dječak probudio i kazao im da mu je sestra nestala”, kazali su sagovornici upoznati sa ovim slučajem.

Turski državljani otišli su u Policijsku stanicu Lapovo i zatražili pomoć nakon čega je alarmirana i niška policija.

“Policijski službenici PU Niš odmah su otišli na benzinsku pumpu i zatekli tinejdžerku kako sjedi na klupi. Kod sebe je imala putnu ispravu, pa je potvrđeno da se radi o maloljetnici koju roditelji traže. Policajci su ostali uz djevojčicu sve dok je roditelji nisu preuzeli i nastavili put”, kaže izvor za “Telegraf”

U niškoj Policijskoj upravi potvrđeno je da su njihovi službenici zbrinuli maloljetnu djevojčicu zatečenu na benzinskoj pumpi u okolini Niša do dolaska roditelja.

Foto: Ilustracija (Printscreen)