Nije ni svanulo kada su snimili scenu kako taj vojnik ulazi u mjesto. Šotri su rekli da je Paja spreman, našminkan, već na setu. “I stvarno, Paja spreman, namjestio se kako treba, prebacio ruku preko stola, namjestio šipak i spava. I dok namještamo svijetlo spava. Snimamo nekoliko kadrova, on i dalje spava. Tek kad Švaba krene da mu otvara šipak, Paja skoči”, prisjeća se Šotra u knjizi “Mnogo više od igre”

Foto. Printscreen

Kada je snimanje kultne serije “Više od igre” bilo blizu kraja, najveći je problem bio ubijediti Pavla Vujisića da neke scene uopšte snimi. Čovjek koji nije želio da glumi kako plače i koji je znao da sjedi u kafani danima i pravo odatle ode na snimanje, svojim je teškim karakterom i velikim talentom dao težinu čitavoj seriji.

Posljednje scene snimaju se u cik zore, a reditelj Zdravko Šotra brine zbog još jedne kafanske noći legendarnog glumca.

“Pajo, bilo bi dobro da legneš na vrijeme…”, rekao mu je Šotra.

“Kaži ti meni šta treba i kad treba ostalo te se ne tiče”, odgovorio mu je Paja.

A trebalo je da legne preko kafanskog stola i glumi da je mrtav, sa stegnutim šipkom, koji ni živ njemački vojnik neće moći da otvori, prenosi “Nedjeljnik”.

Nije ni svanulo kada su snimili scenu kako taj vojnik ulazi u mjesto. Šotri su rekli da je Paja spreman, našminkan, već na setu.

“I stvarno, Paja spreman, namjestio se kako treba, prebacio ruku preko stola, namjestio šipak i spava. I dok namještamo svijetlo spava. Snimamo nekoliko kadrova, on i dalje spava. Tek kad Švaba krene da mu otvara šipak, Paja skoči”, prisjeća se Šotra u knjizi “Mnogo više od igre”, koju je priredila Dragana Bošković.

“Što si me zvao prije zore i budio me ovako rano ako nećeš da me snimaš”, vikao je Vuisić.

“Da si mi ti živ i zdrav, scena je skoro snimljena…”

Tako je nastala legendarna scena još legendarnije serije. Paja je bio sjajan glumac i kada spava…