Nakon što je Ukrajina 1. juna izvela jedan od najodvažnijih napada na rusku teritoriju od početka rata 2022., ruske vlasti pokrenule su veliku potjeru za Artemom Timofejevim, 37-godišnjim bivšim DJ-em, ali i njegovom suprugom, 34-godišnjom Ekaterinom Katjom Timofejevom. Ruski mediji tvrde da je ovaj bračni par bio ključan za izvedbu operacije “Paukova mreža” – tajne ukrajinske operacije kojom su napadnute vazdušne baze širom Rusije.

RUSKI “PEARL HARBOR”

Napad je odmah proglašen ruskim “Pearl Harborom” – zbog iznenađenja, razmjera i posljedica. Prema tvrdnjama ukrajinskih vlasti, napad je izveden sa ukupno 117 dronova skrivenih u krovovima drvenih kućica koje su bile ukrcane na kamione. Kamioni su dovezeni do vazdušnih baza Olenja, Belaja, Ćapiljevo, Ivanovo i Murmansk, a kada je došlo vrijeme za napad, krovovi su se otvorili daljinskim upravljanjem, a dronovi su poletjeli prema svojim metama.

Katja i Artem Timofejev (Foto: Društvene mreže)

Cilj su bili strateški ruski avioni – uključujući Tu-95 i Tu-22M3 bombardere, kao i Berijev A-50, avion za rano upozoravanje. Ukrajina tvrdi da je uništen ili teško oštećen 41 vojni avion, što predstavlja oko 34 odsto ruske flote Tu-95 bombardera koji mogu nositi nuklearno oružje. Šteta je procijenjena na više od 7 milijardi dolara.

TIHI ŽIVOT S DVOSTRUKOM MISIJOM

Artem Timofejev rođen je u ukrajinskom Žitomiru (iako ruske vlasti tvrde da je iz Donjecka), a jedno je vrijeme živio u Kijevu gdje je radio kao DJ i suvlasnik brenda odjeće. Njegova supruga Katja Timofejeva pisala je erotske romane, a najpoznatiji naslov joj je “Postala sam loša dok si me volio”. Par se u nekom trenutku preselio u Rusiju i nastanio u Čeljabinsku.

U decembru 2024. Timofejev je registrovao prevozničku kompaniju i kupio četiri teretna vozila. Prema ruskom portalu Readovka, kamioni korišćeni u napadima bili su registrovani upravo na njegovo ime. Jedan od njih poslužio je kao platforma za lansiranje dronova koji su napali vojnu bazu u Irkutskoj oblasti.

Iako su Timofejevljevi otvoreno iskazivali proukrajinske stavove na društvenim mrežama – uključujući fotografije s Euromajdana – ruske vlasti nisu postavile nikakve prepreke njihovoj integraciji: bez problema su dobili državljanstvo, registrovali kompaniju, kupili vozila i iznajmili skladište koje se nalazilo tik do zgrade FSB-a.

SUMNJA SE DA SU POBJEGLI IZ ZEMLJE

Prema izvještajima, prenosi Index.hr, par je posljednji put viđen u svom stanu u Čeljabinsku sedam dana prije napada, a društvene mreže Ekaterine Timofejeve ugašene su upravo prije početka operacije. Sumnja se da su oboje pobjegli iz Rusije neposredno prije napada, ukrajinske bezbjednosne službe tvrde da su sada na sigurnom u Ukrajini, dok ruski Telegram kanali tvrde da su u Kazahstanu.

Trenutno su svi ogranci ruskog Ministarstva unutrašnjih poslova uključeni u potragu za parom. Uhapšeni su i vozači kamiona koji tvrde da nisu znali šta prevoze – vjerovali su da dostavljaju montažne kućice.

Istražuje se i uloga državljanina Bjelorusije koji je navodno pokušao da spriječi lansiranje dronova u Irkutskoj oblasti.

俄方公布参与无人机袭击俄罗斯空军基地嫌疑人照片

据俄罗斯媒体报道，37 岁的阿尔乔姆·季莫菲耶夫 (Artem Timofeev) 遭到通缉。

他原籍日托米尔，现居住在车里雅宾斯克地区，拥有一队汽车。

此前乌克兰安全局报道称，参与此次行动的所有特工均已抵达乌克兰。https://t.co/vuAqFFqMAI pic.twitter.com/z1El5WRoSq

— 简中圈外·俄乌战争最新消息 (@Fangliusy) June 2, 2025